საქართველოს ადგილობრივ თვითმმართველობათა ეროვნული ასოციაციის (NALAG) მიერ, საუკეთესო პრაქტიკის პროგრამის 2021-2022 წწ. კონკურსის ფარგლებში გამართული სამუშაო შეხვედრების ციკლი დასრულდა.

საუკეთესო პრაქტიკის პროგრამა საქართველოს ათივე რეგიონს მოიცავს და მიზნად ისახავს საქართველოს მუნიციპალიტეტებში საუკეთესო პრაქტიკის მაგალითების გამოვლენასა და სხვა თვითმმართველი ერთეულებისთვის გამოცდილების გაზიარებას.

აღნიშნული პროგრამა გაეროს განვითარების პროგრამის (UNDP) - „რეგიონული და ადგილობრივი განვითარების ხელშეწყობა საქართველოში“ პროექტის, ასევე  შვეიცარიის განვითრების და თანამშრომლობის სააგენტოს (SDC), ავსტრიის განვითარების თანამშრომლობისა (ADC) და საქართველოს რეგიონული განვითარების და ინფრასტრუქტურის სამინისტროს მხარდაჭერით ხორციელდება. 

ქვეყანაში არსებული ეპიდემიოლოგიური სიტუაციიდან გამომდინარე, სასწავლო კურსი ონლაინ რეჟიმში წარიმართა, თუმცა, შეხვედრის მონაწილეებმა მიმდინარე პროცესს პროდუქტიული უწოდეს და აღნიშნეს, რომ ათეა-სა და სხვადასხვა საერთაშორისო ორგანიზაციების მიერ გამოცხადებული კონკურსები, საუკეთესო პრაქტიკის გაზიარებასთან ერთად, მუნიციპალიტეტებს სტიმულს აძლევს შექმნან ადგილობრივ მოსახლეობაზე მორგებული ინოვაციური პროექტები.
​
სამუშაო შეხვედრებს, რომლებიც 2021-2022 წწ. კონკურსის მიზნებისა და ეტაპების, საკონკურსო განაცხადის შევსებისა და წარდგენის წესის, ასევე, შეფასების მეთოდოლოგიის შესახებ მსჯელობას დაეთმო, ათეას ექსპერტები, აღნიშნული პროგრამის კოორდინატორი და ევროპის საბჭოს ადგილობრივ და რეგიონულ ხელისუფლებათა კონგრესთან არსებული ექსპერტთა ჯგუფის წევრი - ნინო ზურაბიშვილი და კახა გურგენიძე უძღვებოდნენ.

​მიმდინარე კონკურსი 8 თემაზე - მოქალაქეთა მონაწილეობა, ადგილობრივი ეკონომიკური განვითარება, ადგილობრივ დონეზე გენდერული თანასწორობა და ადამიანის უფლებები, ღია მმართველობა, გამჭვირვალობა და ინფორმაციის საჯაროობა, ახალგაზრდების გააქტიურების, მობილიზაციისა და ჩართულობის ხელშეწყობა, ასევე, კლიმატის ცვლილება და გარემოს დაცვა, მდგრადი ურბანიზაციის, რევიტალიზაცია და მწვანე ურბანული ეკონომიკა, COVID -19 ვაქცინაციის ხელშეწყობა და პოსტ-კოვიდ აღდგენა გამოცხადდა. განაცხადების მიღების პერიოდი კი, 1 ნოემბრიდან 3 დეკემბრამდე განისაზღვრა.

გამარჯვებული მუნიციპალიტეტები დეკემბრის ბოლოს, მმართველი კომიტეტის შემაჯამებელ სხდომაზე, სხვადასხვა დარგის ექსპერტებით დაკომპლექტებული შეფასების კომისიის დასკვნების გათვალისწინებით გამოვლინდებიან.

​BPP ევროპის საბჭოს მიერ აღიარებული და მის წევრ ქვეყნებში ფართოდ გამოყენებული ინსტრუმენტია, რომელიც მუნიციპალიტეტებში ადგილობრივი თვითმმართველობის უფლებამოსილებების განხორციელებასთან დაკავშირებული წარმატების მაგალითების გამოვლენასა და სხვა მუნიციპალიტეტებში მათ გამოყენებას ისახავს მიზნად.